मॉस्को : रशियातील पूर्व दुर्गम भागातील कामचटकामध्ये एका विमानाचा संपर्क तुटला असल्याचे समोर आले आहे. या विमानात २८ जण असल्याची माहिती आहे. पेट्रोपावलोव्स्क-कामचत्स्की शहरातून पलाना या ठिकाणी जात असलेल्या विमानात २२ प्रवासी आणि सहा क्रू सदस्य होते. विमानाचा संपर्क तुटल्याची माहिती समोर आल्यानंतर शोध मोहीम सुरू करण्यात आली आहे. दोन हेलिकॉप्टर आणि बचाव पथकाला तयार राहण्याचे आदेश देण्यात आले आहेत.
परिवहन मंत्रालयाने दिलेल्या माहितीनुसार, हे विमान अचानकपणे रडारवर दिसेनासे झाले. या विमानाचा शोध घेतला जात आहे. An-26 हे विमान काही वेळेतच उतरणार होते. मात्र, त्याआधीच त्याचा संपर्क तुटला.
#BREAKING Contact lost with plane in Russia's Far East, 28 on board: reports pic.twitter.com/Y8bHzCsbdG
— AFP News Agency (@AFP) July 6, 2021
एका स्थानिक विमान कंपनीकडून या अतिदूर भागात हवाई सेवा चालवली जात असल्याची माहिती अधिकाऱ्यांनी दिली. स्थानिक माध्यमांमध्येही विमान अपघाताबाबत वेगवेगळी माहिती समोर येत आहे. TASS या रशियन वृत्तसंस्थेने विमान समुद्रात कोसळले असल्याचे म्हटले आहे. तर, आणखी एका वृत्तसंस्थेने कोळशाच्या खाणीजवळ विमान कोसळले असण्याची शक्यता वर्तवली.
