पालकमंत्री ॲड. यशोमती ठाकूर यांनीसुद्धा सायकल चालवून घेतला सहभाग
अमरावती (प्रतिनिधी आसिफ कुरैशी) : विभागीय आयुक्त कार्यालय बाहेर काँग्रेसकडून ठिय्या आंदोलन करण्यात आलं आहे. यावेळी मोठा वाद पेटल्याचं समोर आलं आहे. आंदोलन थांबवण्यासाठी आलेल्या पोलीस अधिकाऱ्यांविरोधातही यावेळी जोरदार नारेबाजी करण्यात आली आहे. भाजपच्या केंद्र सरकारचा निषेध म्हणून काँग्रेसने सायकल रॅली काढलेली. ही रॅली अमरावती ग्रामीण काँग्रेसच्या पदाधिकाऱ्यांनी जिल्हा परिषद येथून काढण्यात आली होती.
सगळ्यात महत्त्वाचं म्हणजे या सायकल रॅलीमध्ये खुद्द राज्याच्या बालविकास महिला मंत्री आणि अमरावतीच्या पालकमंत्री ॲड. यशोमती ठाकूर यांनी सुद्धा सायकल चालवून सहभाग घेतला होता. ही सायकल रॅली थेट विभागीय आयुक्तालयात जाऊन तिथे निवेदन देणार होती. त्याच कार्यालय प्रवेशद्वारासमोर पोलिसांनी सर्व काँग्रेसच्या पदाधिकाऱ्यांना अडवून पालकमंत्र्यांसह निवडक १० पदाधिकाऱ्यांना आत सोडण्यात आले.
यावेळी जिल्हा परिषद सभापती बाळासाहेब हिंगणीकर यांच्यासह काही पदाधिकाऱ्यांना आत जाण्यास पोलिसांनी परवानगी नाकारल्याने गाडगे नगर पोलीस निरीक्षक आसाराम चोरमले यांच्या सोबत हुज्जत घालण्यात आली. त्यात चोरमले यांनीही हिंगणीकर यांना पोलीसी भाषेत खडेबोल सुनावले. यामुळे पुन्हा काँग्रेस पदाधिकाऱ्यांसोबत पोलीस अधिकाऱ्यांचा चांगलाच शाब्दिक वाद निर्माण झाला. काहीच वेळात पदाधिकारी सह कार्यकर्त्यांनी चोरमले यांच्या विरोधात विभागीय आयुक्तालय प्रवेशद्वारा बाहेर ठिय्या आंदोलन करुन चोरमले यांच्या विरोधात नारे देण्यात आले.
हा सर्व प्रकार पालकमंत्री ठाकूर यांना निवेदन देऊन परत प्रवेश द्वार जवळ आल्यावर लक्षात आला. या ठिकाणी तणावाचे वातावरण निर्माण झाल्याने शेवटी पालकमंत्री ठाकूर यांनी मध्यस्थी केली. काही वेळाने काँग्रेस पदाधिकारी आणि पोलीस अधिकारी चोरमले यांच्यासोबत चर्चा करून वाद संपुष्टात आणला.
