श्रीनगर (ऑल इंडिया उपसंपादक राजन चौधरी) : जम्मू-काश्मीरमध्ये दहशतवादाविरोधात एनआयएने मोठी कारवाई केली आहे. दहशतवादाला आर्थिक मदत प्रकरणी राष्ट्रीय तपास संस्थेने जम्मू-काश्मीरमध्ये अनेक ठिकाणी छापे टाकले. कट्टरपंथियांशीसंबंधित दहशतवादाला आर्थिक मदत प्रकरणी १० दिवसांपूर्वी एक गुन्हा दाखल करण्यात आला होता. या प्रकरणी जम्मू-काश्मीरमध्ये तपास मोहीम राबवण्यात येत आहे. हे प्रकरण ऑनलाइन कट्टरपंथियांशी संबंधित आहे. यात विदेशीतील शक्तींचा संबंध असल्याचाही तपास सुरू आहे, अशी माहिती एका वरिष्ठ अधिकाऱ्याने दिली. या प्रकरणी काही जणांना चौकशीसाठी ताब्यात घेण्यात आले आहे.
श्रीनगर, बारामुला आणि अनंतनाग जिल्ह्यांत तपास मोहीम सुरू आहे. यात एनआयएसोबत गुप्तचर विभाग, रॉ (रिसर्च अँड एनालिसिस विंग ) आणि जम्मू-काश्मीर पोलिसांचाही समावेश आहे. मोस्ट वॉन्टेड दहशतवादी सय्यद सलाउद्दीन यांच्या दोन मुलांसह दहशतवाद्यांना आर्थिक मदत प्रकरणी ११ सरकारी कर्मचाऱ्यांना बडतर्फ करण्यात आलं आहे. या कारवाईच्या दुसऱ्याच दिवशी ही छापेमारी सुरू आहे.
हिजबुल मुजाहिद्दीनला दहशतवादी कारवायांसाठी हवालाच्या माध्यमातून पैसा जमा करणं, मिळवणं, गोळा करून तो वितरीत करण्यात सामिल दोन जणांचा छडा लावण्यात आला आहे, असं अधिकाऱ्याने सांगितलं. एनडीटीव्हीने हे वृत्त दिलं आहे.
Jammu and Kashmir: NIA raids underway at multiple locations including Anantnag. Details awaited.
— ANI (@ANI) July 11, 2021
बडतर्फ करण्यात आलेले कर्मचारी शिक्षण, पोलिस, कृषी विका, विज, आरोग्य विभाग आणि एसकेआयएमएस (शएर ए काश्मीर इन्स्टिट्यूट ऑफ मेडिकल सायन्सेस )चे होते. या ११ कर्मचाऱ्यांपैकी ४ अनंतनागमधून, ३ बडगाममधून आणि बारामुला, श्रीनगर, पुलवामा आणि कुपवाडातून प्रत्येकी एकाचा समावेश आहे.
दहशतवाद्यांना आर्थिक मदत केल्याप्रकरणी हिजबुल मुजाहिद्दीनच्या म्होरक्याचे सय्यद अहमद शकील आणि शाहिद युसूफ या दोन मुलांना सेवेतून बडतर्फ करण्यात आलं आहे. यापैकी एसकेआयएमएसमध्ये आणि दुसरा शिक्षण विभागात होता.
