पल्लकड (केरळ) : सोमवारी सकाळी राष्ट्रीय स्वयंसेवक संघाच्या एका कार्यकर्त्याची निर्घृण हत्या करण्यात आली. २७ वर्षीय कार्यकर्त्याची त्याच्या पत्नीसमोरच चाकूने भोसकून हत्या केली. हा कार्यकर्ता पत्नीला तिच्या ऑफिसमध्ये सोडण्यासाठी जात होता, त्याचवेळी ही घटना घडली. या घटनेची माहिती मिळताच, पोलीस घटनास्थळी पोहोचले. पंचनामा करून मृतदेह विच्छेदनासाठी रुग्णालयात पाठवण्यात आला. या घटनेनंतर भाजप आणि आरएसएसचे अनेक कार्यकर्ते घटनास्थळी पोहोचले.
पोलीस सूत्रांनी दिलेल्या माहितीनुसार, संजीतच्या शरीरावर ५० हून अधिक जखमांचे घाव होते. त्याची निर्घृण हत्या करण्यात आली. या घटनेमुळे परिसरात तणावाचे वातावरण आहे. या ठिकाणी पोलीस मोठ्या संख्येने तैनात करण्यात आले आहेत.
ही घटना मांबरम परिसरात घडली. पोलिसांनी दिलेल्या माहितीनुसार, संजीत याच्या हत्येमागे दोन संघटनांच्या कार्यकर्त्यांचा हात असल्याचा संशय व्यक्त होत आहे. या घटनेनंतर तेथून पसार झालेल्या संशयित आरोपींना अटक करण्यासाठी शोधमोहीम सुरू केली आहे. या घटनेची चौकशी करण्यात येत आहे, असेही पोलिसांनी सांगितले.
मिळालेल्या माहितीनुसार, संजीत आपल्या पत्नीला घेऊन तिच्या ऑफिसात जात होता. भाजपने केलेल्या आरोपांनुसार, हल्लेखोरांनी एलाप्पल्ली येथे राहणाऱ्या संजीतचा एका वाहनाने पाठलाग केला. त्याचवेळी कारमधून आलेल्या हल्लेखोरांनी संजीतच्या दुचाकीला जोरदार धडक दिली. जमिनीवर कोसळल्यानंतर संजीतवर चाकूने हल्ला केला. या घटनेचा भाजप कार्यकर्त्यांनी निषेध केला आहे. भाजप प्रदेश अध्यक्ष सुरेंद्रन यांनी आरोप केला की, ही हत्या पूर्वनियोजित होती. राज्यात अशा प्रकारच्या घटनांना पोलीस आणि राज्य सरकारचे अपयश कारणीभूत आहे, असे ते म्हणाले.
