मुंबई (प्रतिनिधी हितेश मिस्त्री) : अंधेरी परिसरातून ३.९० किलो ‘इफेड्रेन’ या अंमली पदार्थाचा साठा जप्त करण्यात आला आहे. हा साठा परदेशात पाठवला जाणार होता. ‘नार्कोटिक्स कन्ट्रोल ब्युरो’ने (एनसीबी) जवळपास महिनाभरानंतर अमली पदार्थविरोधी कारवाई केली आहे.
एनसीबीला यासंबंधी गुप्त माहिती मिळाली होती. त्यानुसार त्यांनी अंधेरीतील एका कुरियर कंपनीच्या कार्यालयात छापा टाकला. त्यावेळी महिलांसाठीच्या कपड्यांच्या खोक्यात हा साठा लपवून ठेवल्याचे दिसून आले. हा साठा पुण्याहून मागवण्यात आला होता. तसेच तो ऑस्ट्रेलियाला पाठवला जाणार होता, असे तपासात समोर आले. या संदर्भात गुन्हा दाखल झाला असून अधिक तपास सुरू आहे.
अमली पदार्थविरोधी कारवाई करण्यात एनसीबी ही अग्रणी केंद्रीय तपास संस्था आहे. या तपास संस्थेद्वारे मागील वर्षी ऑक्टोबरपर्यंत मोठ्या कारवाया सुरू होत्या. वर्षभरात सुमारे २५हून अधिक कारवाया करण्यात आल्या. त्यामध्ये जवळपास १०० जणांना अटक झाली. एनसीबी मुंबईचे तत्कालिन संचालक समीर वानखेडे यांच्या नेतृत्वाखाली या कारवाया केल्या होत्या. परंतु ऑक्टोबरमध्ये आर्यन खानच्या अटक प्रकरणापासून वानखेडे हे संशयाच्या भोवऱ्यात सापडले.
