मुंबई (उपसंपादक दिलीप दळवी) । महाराष्ट्र वस्तू आणि सेवा कर विभागाने कर चुकवणाऱ्या फर्मविरुद्ध केलेल्या विशेष चौकशी मोहिमेअंतर्गत ३ सप्टेंबर २०२५ रोजी मेसर्स केपी क्रिएशन वर्ल्ड या फर्मचे मालक अंकित महेंद्रकुमार गांधी (वय-३६ वर्षे) यांना ७.५६ कोटीची कर चोरी प्रकरणी अटक केली असल्याचे राज्य कर उपआयुक्त अन्वेषण – क यांनी प्रसिद्धीपत्राद्वारे जाहीर केले आहे.
बनावट इनव्हॉइसमध्ये सहभागी असलेल्या करदात्याविरुद्ध महाराष्ट्र वस्तू आणि सेवा कर विभागाने सुरू केलेल्या विशेष कारवाईचा भाग म्हणून मेसर्स केपी क्रिएशन वर्ल्डच्या बाबतीत चौकशी करण्यात आली. तपासादरम्यान, अंकित महेंद्रकुमार गांधी यांनी वस्तूंच्या कोणत्याही हालचाली / व्यवहार शिवाय, अस्सल/अस्तित्वात नसलेल्या करदात्यांकडून ७.५६ कोटी रुपयांचे बनावट इनपुट टॅक्स क्रेडिट (आयटीसी) मिळवले असल्याचे आढळून आले.
अतिरिक्त मुख्य न्यायदंडाधिकारी मुंबई यांनी अंकित महेंद्रकुमार गांधी यांना १७ सप्टेंबर २०२५ पर्यंत न्यायालयीन कोठडी सुनावली आहे. राज्य कर विभागाच्या सहाय्यक आयुक्त दिप्ती एन. पिलारे, संतोष डी. लोंढे आणि संतोष आर. खेडकर यांनी राज्य कर निरीक्षक/कर सहाय्यकांसह ही कारवाई केली. मोहीम, राज्य कर सहआयुक्त, अन्वेषण क विभाग, मुंबई व यास्मीन अ. मोळकर राज्य कर उपायुक्त, अन्वेषण-क विभाग, मुंबई यांच्या मार्गदर्शनाखाली पार पाडण्यात आली.
