बुलडाणा (जिल्हा प्रतिनिधी सचिन जगदाळे) । छत्रपती शिवाजीनगर येथील रहिवासी व सामाजिक कार्यकर्ते श्री. संतोष संजीवन मांजरे यांच्या पत्नी (अर्धांगिनी) सौ. नंदाताई संतोष मांजरे यांचा दिनांक 13/12/2025 रोजी वाढदिवस होता. हा वाढदिवस केवळ केक कापून किंवा औपचारिक शुभेच्छांपुरता न ठेवता, समाजासाठी काहीतरी सकारात्मक करण्याचा आदर्श मांजरे परिवाराने घालून दिला आहे.
या प्रसंगी श्री. संतोष संजीवन मांजरे व त्यांचे सुपुत्र यश संतोष मांजरे यांनी नांदुरा रेल्वे स्टेशन व इतर ठिकाणी थंडीने त्रस्त असलेल्या गरजू, निराधार व बेघर लोकांना रजई व ब्लॅंकेटचे वाटप करून माणुसकीचे दर्शन घडविले. हाडे गोठवणाऱ्या थंडीत उघड्यावर रात्र काढणाऱ्या गरिबांना उब मिळावी, त्यांचे हाल थोडेसे तरी कमी व्हावेत, हाच या उपक्रमामागचा खरा उद्देश होता.
मांजरे परिवाराच्या या कृतीमुळे समाजात एक वेगळाच संदेश गेला आहे. वाढदिवस, सण-समारंभ किंवा वैयक्तिक आनंदाचे क्षण समाजासाठी उपयोगात आणले, तर त्यातून खऱ्या अर्थाने समाधान आणि आनंद मिळतो, हे त्यांनी कृतीतून दाखवून दिले. “मदत ही जाहिरातीसाठी नव्हे तर माणुसकीसाठी असते,” हा संदेश या उपक्रमातून ठळकपणे अधोरेखित झाला.
आजच्या धावपळीच्या आणि स्वार्थी होत चाललेल्या समाजात अशा संवेदनशील उपक्रमांची नितांत गरज आहे. मांजरे परिवाराने दिलेल्या या सामाजिक संदेशातून इतर नागरिकांनीही प्रेरणा घ्यावी व आपल्या परीने गरजू लोकांच्या मदतीसाठी पुढे यावे, हीच अपेक्षा आहे.
सौ. नंदाताई मांजरे यांच्या वाढदिवसानिमित्त केलेला हा उपक्रम केवळ मदतकार्य न राहता, समाजाला दिशा देणारा आणि प्रेरणा देणारा आदर्श ठरला आहे. अशा कार्यातूनच समाजात माणुसकी, सहकार्य आणि सामाजिक बांधिलकी जिवंत राहते, हे मांजरे परिवाराने पुन्हा एकदा सिद्ध करून दाखवले आहे.
