शिर्डी (प्रतिनिधी) | श्री साईबाबा संस्थान विश्वस्त व्यवस्थेतील आऊटसोर्स (कंत्राटी) आणि कायम कर्मचाऱ्यांवर प्रशासनाकडून होत असलेल्या कथित अन्यायकारक कारवाईविरोधात आता महाराष्ट्र नवनिर्माण सेना (मनसे) पूर्णपणे आक्रमक झाली आहे. कर्मचाऱ्यांना न्याय मिळवून देण्यासाठी मनसेच्या पदाधिकाऱ्यांनी संस्थानच्या मुख्य कार्यकारी अधिकाऱ्यांना (CEO) नुकतेच एक सविस्तर निवेदन दिले असून, मनमानी कारभार न थांबल्यास तीव्र आंदोलनाचा इशारा दिला आहे.
कर्मचाऱ्यांनी मांडलेल्या व्यथेनुसार, संस्थानमध्ये सध्या किरकोळ कारणांवरून कोणतीही पूर्वसूचना न देता किंवा कोणतीही अधिकृत चौकशी न करता थेट सात-सात दिवसांचे वेतन कपात केले जात आहे. ड्युटीदरम्यान नजर चुकून झोप लागणे किंवा तंबाखू/गायछाप सेवन केल्यासारख्या कारणांवरून कर्मचाऱ्यांवर थेट दंडात्मक आणि कठोर कारवाई केली जात आहे. प्रशासनाच्या या भूमिकेमुळे सर्वसामान्य कर्मचाऱ्यांमध्ये सध्या प्रचंड भीतीचे वातावरण निर्माण झाले आहे.
विशेषतः संस्थानमधील आऊटसोर्स कर्मचाऱ्यांना मिळणारे मासिक मानधन आधीच अत्यंत अत्यल्प आहे. अशा परिस्थितीत अचानक सात दिवसांचे वेतन कापले गेल्यामुळे त्यांच्या कुटुंबांवर मोठे आर्थिक संकट ओढवत आहे. याशिवाय, रात्रीच्या वेळी तपासणीच्या नावाखाली काही वरिष्ठ अधिकाऱ्यांकडून कर्मचाऱ्यांना अरेरावीची भाषा वापरून त्यांचा मानसिक छळ केला जात असल्याचा गंभीर आरोपही निवेदनात करण्यात आला आहे.
“प्रशासनाने कर्मचाऱ्यांना मशीन न समजता त्यांच्या व्यावहारिक समस्या समजून घ्याव्यात. ही मनमानी आणि अन्यायकारक वेतन कपात तातडीने न थांबल्यास महाराष्ट्र नवनिर्माण सेनेच्या वतीने शिर्डीत तीव्र आंदोलन आणि उपोषण छेडले जाईल.”
— मनसे पदाधिकारी
मनसेने निवेदनात म्हटले आहे की, ‘वेतन भुगतान कायदा १९३६’ (Payment of Wages Act) नुसार कोणत्याही कर्मचाऱ्याचे वेतन कपात करण्यापूर्वी एक ठराविक कायदेशीर प्रक्रिया पाळणे बंधनकारक आहे. मात्र, संस्थान प्रशासन या नियमांना बगल देऊन थेट मनमानी पद्धतीने दंडात्मक कारवाई करत आहे. कर्मचारी झोपेत सापडला म्हणून त्याचे वेतन थेट कापण्याची कोणतीही परवानगी कायद्यात नाही. त्यामुळे या संपूर्ण प्रकरणाची सखोल चौकशी करून संबंधित दोषी अधिकाऱ्यांवर तात्काळ कारवाई करण्यात यावी, अशी मागणी मनसेने केली आहे.
हे निवेदन देताना मनसेचे जिल्हाध्यक्ष राजेश लुटे, तालुका अध्यक्ष गणेश जाधव, मनसे विद्यार्थी सेना शिर्डी शहर अध्यक्ष प्रशांत वाघचौरे, लक्ष्मण आण्णा कोतेकर, शिर्डी शहर अध्यक्ष गौरव भालेराव, रुपी थिवर, अभिषेक पोपळघट, चेतन झिंजाड, प्रवीण आराणे, किरण पगारे, रवी कुसाळकर यांच्यासह मनसेचे अनेक पदाधिकारी आणि कार्यकर्ते मोठ्या संख्येने उपस्थित होते.
