अहिल्यानगर (जिल्हा क्राईम रिपोर्टर अण्णासाहेब बनसोडे) | “झाडे लावा, झाडे जगवा” हा संदेश केवळ भिंतींवर न लिहिता तो प्रत्यक्षात कसा उतरवायचा, याचा एक उत्तम आणि आदर्श वस्तूपाठ साक्री तालुक्यातील सामोडे येथील दत्तनगर गल्लीतील नागरिकांनी घालून दिला आहे. काही वर्षांपूर्वी ग्रामपंचायतीच्या ५ टक्के निधीतून दत्तनगर गल्लीत लावण्यात आलेल्या आंब्याच्या झाडांना आता रसाळ कैऱ्या लागल्या आहेत. नागरिकांनी दाखवलेल्या पर्यावरणप्रेमामुळे आज ही गल्ली हिरवीगार झाली असून, त्यांच्या कष्टाला निसर्गाने गोड फळांच्या रूपाने दाद दिली आहे.
सामोडे ग्रामपंचायतीच्या वतीने ५ टक्के निधीचा विनियोग करून दत्तनगर गल्लीत वृक्षारोपण मोहीम राबवण्यात आली होती. यामध्ये प्रामुख्याने आंब्याची झाडे लावण्यात आली. केवळ शासकीय योजना म्हणून झाडे लावून प्रशासनाने आणि गावकऱ्यांनी सोडून दिले नाही, तर गल्लीतील प्रत्येक घरमालकाने या रोपट्यांची जबाबदारी घेतली. आपल्या घरातील एका लहान मुलाप्रमाणे आणि सदस्याप्रमाणे या झाडांची काळजी घेण्यात आली. वेळोवेळी पाणी घालणे, कडक उन्हापासून रक्षण करणे, गुराढोरांपासून वाचवण्यासाठी कुंपण घालणे अशी सातत्याने निगा राखल्यामुळे आज ही झाडे मोठी झाली आहेत.
नागरिकांच्या याच कष्टाचे चीज आता झाले असून, दत्तनगर गल्लीतील या आंब्याच्या झाडांना मोठ्या प्रमाणावर कैऱ्या आल्या आहेत. झाडांवर डोलणाऱ्या या कैऱ्या पाहून परिसरातील नागरिक भलतेच आनंदित झाले आहेत. आता या गल्लीतील नागरिकांना स्वतः जतन केलेल्या घरच्या झाडांच्या कैऱ्यांचे लोणचे आणि पन्हे खाण्याचा मनमुराद आनंद लुटता येणार आहे.
झाडे लावणे जितके महत्त्वाचे आहे, त्याहूनही अधिक ती झाडे वर्षानुवर्षे जगविणे हे आजच्या प्रदूषणाच्या काळात किती गरजेचे आहे, याचा एक अत्यंत मोलाचा आणि सकारात्मक संदेश दत्तनगर गल्लीतील नागरिकांनी आपल्या कृतीतून समाजाला दिला आहे. पर्यावरण संरक्षण, उन्हाळ्यात मिळणारी सुखद सावली, शुद्ध हवा आणि आता रसाळ फळे अशा अनेक माध्यमांतून या झाडांनी नागरिकांचे जीवन समृद्ध केले आहे. या सुंदर परिसराची पाहणी करताना आणि पहिल्या कैऱ्या तोडताना ज्येष्ठ पत्रकार दिलीप घरटे हे देखील उपस्थित होते.
दत्तनगर गल्लीतील नागरिकांनी दाखवलेले हे पर्यावरणप्रेम आणि सामूहिक प्रयत्न आजूबाजूच्या इतर गावातील नागरिकांसाठी आणि वस्त्यांसाठी नक्कीच प्रेरणादायी ठरणारे आहे. सर्व स्तरांतून या गल्लीतील सजग नागरिकांचे कौतुक होत आहे.
