सातारा (उपसंपादक अरुण मोरे) | डिलिव्हरी देण्याच्या बहाण्याने बंद घरांची रेकी करून घरफोडी करणाऱ्या एका सराईत चोरट्याला सातारा शहर पोलिसांच्या डी.बी. (डिटेक्शन ब्रांच) पथकाने अत्यंत शिताफीने अटक केली आहे. अटक करण्यात आलेला आरोपी हा ‘ब्लिंकिट’ (Blinkit) कंपनीचा डिलिव्हरी बॉय असून, त्याच्याकडून गुन्ह्यातील सोन्याचे दागिने, मोबाईल आणि चोरीसाठी वापरलेली कार असा एकूण १३ लाख १ हजार ५०० रुपयांचा मुद्देमाल जप्त करण्यात आला आहे.
मिळालेल्या माहितीनुसार, १५ जून २०२६ रोजी सातारा शहरातील शाहूनगर येथील आमराई कॉलनीत असलेल्या ‘शिवालय’ अपार्टमेंटमधील एका बंद घराचे कुलूप भरदिवसा अज्ञात चोराने तोडले होते. चोरट्याने घरात प्रवेश करून सोन्याचे मौल्यवान दागिने लंपास केले होते. या धाडसी घरफोडीप्रकरणी सातारा शहर पोलीस ठाण्यात गुन्हा दाखल करण्यात आला होता.
गुन्ह्याचे गांभीर्य ओळखून सातारा शहर पोलिसांचे डी.बी. पथक आरोपीच्या शोधात होते. तांत्रिक विश्लेषण आणि गुप्त बातमीदारांकडून मिळालेल्या माहितीच्या आधारे पोलिसांना एका संशयिताचे नाव समजले. मात्र, आरोपीचा कोणताही निश्चित पत्ता नसल्याने त्याचा शोध घेणे पोलिसांसमोर मोठे आव्हान होते.
विशिष्ट माहितीच्या आधारे डी.बी. पथक सलग दोन दिवस आरोपीच्या मागावर होते. दरम्यान, पहाटेच्या सुमारास आरोपी एका चारचाकी वाहनातून जात असताना पोलिसांनी त्याला थांबवण्याचा इशारा केला. मात्र, तो पळून जाऊ लागल्याने पथकाने फिल्मी स्टाईलने पाठलाग करून त्याला ताब्यात घेतले.
पोलिसांच्या तपासात एक धक्कादायक बाब समोर आली आहे. अटक करण्यात आलेला आरोपी हा ऑनलाईन डिलिव्हरी देणाऱ्या ‘ब्लिंकिट’ कंपनीत काम करत होता. विविध सोसायट्यांमध्ये सामान डिलिव्हरी करण्यासाठी जात असताना तो तिथली बंद घरे हेरायचा (रेकी करायचा) आणि संधी मिळताच तिथे घरफोडी करायचा.
आरोपीला अटक करून माननीय न्यायालयात हजर केले असता, न्यायालयाने त्याला पोलीस कोठडी सुनावली. पोलीस कोठडी दरम्यान झालेल्या सखोल चौकशीत त्याने शाहूनगर येथील चोरीची कबुली दिली. त्यानंतर पोलिसांनी त्याच्याकडून चोरीस गेलेले सोन्याचे दागिने, गुन्ह्यात वापरलेले चारचाकी वाहन (कार), मोबाईल फोन असा एकूण ₹१३,०१,५००/- (१३ लाख १ हजार ५०० रुपये) मुद्देमाल जप्त करण्यात आला आहे.
सदरची उल्लेखनीय कारवाई पोलीस अधीक्षक निखिल पिंगळे, अप्पर पोलीस अधीक्षक डॉ. वैशाली कडूकर, उपविभागीय पोलीस अधिकारी राजीव नवले आणि वरिष्ठ पोलीस निरीक्षक सचिन म्हेत्रे यांच्या मार्गदर्शनाखाली करण्यात आली.
या कारवाईत डी.बी. पथकाचे पोलीस उपनिरीक्षक सुधीर मोरे, पोलीस अंमलदार निलेश यादव, निलेश जाधव, विक्रम माने, प्रवीण कडव, पंकज मोहिते, तुषार भोसले, सागर गायकवाड, सुहास कदम, सचिन रिटे, संतोष घाडगे, मच्छिंद्रनाथ माने, आशिकेष डोळस, वैभव माने, सुशांत कदम, सचिन आदमाने तसेच सायबर विभागाचे प्रशांत मोरे आणि रामदास भास्करवाड यांनी महत्त्वपूर्ण भूमिका बजावली.
