कल्याण (प्रतिनिधी प्रशांत ल.ढोणे) । डोंबिवलीतील रामनगर पोलीस ठाण्याच्या हद्दीत बिल्डिंग वरून पडून बांधकाम कामगाराच्या मृत्यूशी संबंधित गंभीर प्रकरणाची माहिती घेण्यासाठी गेलेल्या गौतम गवई या पत्रकारासोबत येथील ड्युटीवर असलेले सदर प्रकरणाचे तपास अधिकारी चव्हाण यांनी कथितरित्या अरेरावी, शिवीगाळ तसेच खंडणीचा खोटा गुन्हा दाखल करण्याची धमकी दिल्याच्या आरोपावरून व्हॉईस ऑफ मीडियाने आक्रमक भूमिका घेतली आहे.
या प्रकरणी सोमवार रोजी दुपारी 4 वाजता व्हॉईस ऑफ मीडियाच्या पदाधिकाऱ्यांनी अप्पर पोलीस अधीक्षक संजय जाधव यांची भेट घेऊन संपूर्ण प्रकरणाची स्पष्ट भूमिका मांडली. आणि पत्रकारांशी गैरवर्तन करणाऱ्या संबंधित पोलीस अधिकाऱ्यांची निष्पक्ष चौकशी करून दोषींवर कठोर कायदेशीर कारवाई करण्यात यावी अशी मागणी करण्यात आली त्यावर अप्पर पोलीस आयुक्त यांनी चौकशी करून योग्य कारवाई करण्यात येईल असे आश्वासन संजय जाधव यांनी दिल्याची माहिती व्हॉईस ऑफ मीडियाच्या पदाधिकाऱ्यांनी दिली.
कामगाराच्या मृत्यूचे प्रकरण गंभीर स्वरूपाचे असल्याने सत्य परिस्थिती जनतेसमोर यावी आणि तपासातील महत्त्वाच्या बाबींची माहिती मिळावी या उद्देशाने व्हॉईस ऑफ मीडिया सदस्य तथा ‘राष्ट्रभूमी भरारी’चे संपादक गौतम गवई हे रामनगर पोलीस ठाण्यात गेले होते. तपासाबाबत माहिती घेण्यासाठी व काही महत्त्वाचे प्रश्न उपस्थित करण्यासाठी संबंधित तपासी अधिकाऱ्यांशी संपर्क साधण्यात आला असता पोलीस उपनिरीक्षक प्रसाद चव्हाण यांनी कथितरित्या अरेरावी व दादागिरीची भाषा वापरून शिवीगाळ केली तसेच पत्रकाराविरोधात खंडणीचा खोटा गुन्हा दाखल करण्याची धमकी दिल्याचा आरोप निवेदनात करण्यात आला आहे.
पत्रकारांशी अशा प्रकारे गैरवर्तन होणे लोकशाहीच्या चौथ्या स्तंभासाठी गंभीर बाब असून या प्रकरणाची निष्पक्ष चौकशी होऊन सत्य समोर यावे अशी मागणी व्हॉईस ऑफ मीडियाने केली आहे.दरम्यान या प्रकरणात नेमकं काय कारवाई केली जाईल याकडे सर्वांचे लक्ष लागले आहे. यावेळी व्हॉईस ऑफ मीडिया महाराष्ट्र कोअर कमिटी सदस्य व ठाणे जिल्हा सुप्रिमो गौतम वाघ, महाराष्ट्र राज्य सहसंघटक सुरेश जगताप, जगन्नाथ जावळे, संतोष क्षेत्रे, रजनीकांत गायकवाड, ताराचंद तायडे, प्रशांत लक्ष्मण ढोणे, राजू दोंदे, देवानंद पाढेन, राजदीप जगताप यांच्यासह आदी पत्रकार उपस्थित होते.या प्रकरणी संघटनेच्या भूमिकेला पाठिंबा देत उपस्थित राहिलेल्या सर्व पत्रकारांचे व्हॉईस ऑफ मीडिया पदाधिकाऱ्यांनी मनःपूर्वक आभार मानले.
