जळगाव (संपादक सुनिल पाटील) | लोकशाहीमध्ये पत्रकार हे नागरिकांचे ‘डोळे आणि कान’ मानले जातात. मात्र, सध्या काही ठिकाणी आंदोलनांचे वृत्तांकन करणाऱ्या तरुण पत्रकारांना करण्यात आलेला अटकाव, त्यांची स्थानबद्धता (Detention) तसेच त्यांच्यावरील शारीरिक अरेरावी व छळ केल्याच्या घटना समोर येत आहेत. या अत्यंत निंदनीय प्रकाराबद्दल प्रसिद्ध पक्षीमित्र राजेंद्र गाडगीळ यांनी तीव्र शब्दांत संताप व्यक्त केला असून, पत्रकारांवरील दडपशाहीचा जाहीर निषेध केला आहे.
याबाबत आपली स्पष्ट भूमिका मांडताना राजेंद्र गाडगीळ यांनी म्हटले आहे की, जेव्हा पत्रकार आपले कर्तव्य बजावण्यासाठी प्रत्यक्ष मैदानावर उतरतात, तेव्हा त्यांच्यावर होणारा कोणताही अन्याय लोकशाहीत स्वीकारार्ह ठरू शकत नाही.
पत्रकार केवळ स्वतःसाठी वृत्तांकन करत नसतात, तर देशातील सामान्य जनतेला सत्य आणि वस्तुस्थिती कळावी यासाठी ते स्वतःचा जीव धोक्यात घालून काम करतात. पत्रकारांचा आवाज दाबणे म्हणजे प्रत्यक्षपणे नागरिकांचा ‘माहिती मिळवण्याचा मूलभूत अधिकार’ हिरावून घेण्यासारखे आहे, असे गाडगीळ यांनी स्पष्ट केले. पत्रकारिता हा केवळ भाषण स्वातंत्र्याचा भाग नसून सत्य जनतेपर्यंत पोहोचवण्याचे ते महत्त्वाचे माध्यम आहे. पत्रकारांचे कॅमेरे व मोबाईल जप्त करणे किंवा त्यांना काम करण्यापासून रोखणे म्हणजे त्यांच्या कार्यस्वातंत्र्यावर थेट गदा आणण्यासारखे आहे, असे मत त्यांनी व्यक्त केले.
विशेषतः जे नवीन आणि तरुण पत्रकार अत्यंत निष्ठेने व प्रामाणिकपणे ग्राउंड रिपोर्टिंग करत असतात, त्यांना कायदेशीर आणि नैतिक पाठबळ मिळणे अत्यंत गरजेचे आहे. अशा पत्रकारांना धमकावून किंवा दडपशाही करून गप्प बसवण्याचे प्रयत्न करणे म्हणजे लोकशाहीचा मुख्य गाभा कमकुवत करण्यासारखे असल्याचे त्यांनी नमूद केले.
राजेंद्र गाडगीळ यांनी प्रशासन आणि सर्व जबाबदार यंत्रणांना जाहीर आवाहन केले आहे की, निष्पक्ष वृत्तांकन करणाऱ्या सर्व पत्रकारांना तातडीने पूर्ण संरक्षण आणि सुरक्षित वातावरण पुरवले जावे. लोकशाहीचा चौथा स्तंभ मजबूत ठेवण्यासाठी आपण एक सुजाण नागरिक म्हणून नेहमी निर्भीड आणि सत्यवादी पत्रकारांच्या पाठीशी खंबीरपणे उभे राहणार असल्याचे त्यांनी शेवटी म्हटले आहे.
